നവരത്നങ്ങളില്‍ ഏറ്റവും ശ്രേഷ്ഠമാണ് വജ്രം. ഗ്രീക്ക് വിശ്വാസ പ്രകാരം സൗന്ദര്യ ദേവതയായ വീനസിനെ പ്രതിനിധീകരിക്കുന്ന രത്നമാണിത്. ശുക്രന്‍റെ രത്നമായാണ് ഭാരതീയ ജ്യോതിഷത്തില്‍ വജ്രം അറിയപ്പെടുന്നത്. ശുദ്ധമായ വെള്ളനിറത്തിലുള്ള വജ്രങ്ങളാണ് ഏറ്റവും ശ്രേഷ്ഠമെന്ന് കണക്കാക്കുന്നു. ചില ഖനികളില്‍ മഞ്ഞ, നീല, പിങ്ക് നിറങ്ങളിലും വജ്രങ്ങള്‍ ലഭിക്കാറുണ്ട്. കരിയുടെ ക്രിസ്‍റ്റല്‍ രൂപമായ വജ്രങ്ങള്‍ക്ക് പഴക്കം ചെല്ലുന്തോറും തിളക്കം വര്‍ദ്ധിക്കും.
ഭാരതീയ ജ്യോതിഷ-രത്നശാസ്ത്രം അനുസരിച്ച് വജ്രം എല്ലാവര്‍ക്കും തന്നിഷ്ട പ്രകാരം ധരിക്കാവുന്ന രത്നമല്ല. ജാതക പ്രകാരം തനിക്ക് അനുയോജ്യമാണോ എന്ന് ജ്യോതിഷ രത്ന ശാസ്ത്രത്തില്‍ അറിവും പ്രാവീണ്യവുമുള്ളവരെക്കൊണ്ട് പരിശോധിപ്പിച്ചു വേണം വജ്രം ധരിക്കാന്‍. ശുക്ര ഗ്രഹത്തിന്‍റെ രത്നമാണിത്. ജാതകത്തില്‍ ശുക്രന്‍ ദുര്‍ബലനായാല്‍ ജ്യോതിഷികള്‍ വജ്രധാരണം നിര്‍ദ്ദേശിക്കുന്നു.
വജ്രം ധരിക്കുന്നതിന്‍റെ ഗുണഫലങ്ങള്‍
വിവാഹം വേഗം നടക്കാനും ദാമ്പത്യത്തിലെ പൊരുത്തക്കേടുകള്‍ പരിഹരിച്ച് ഊഷ്മളതയും സൗഖ്യവും സംതൃപ്തിയും നിലനിര്‍ത്താനും വജ്രം സഹായിക്കും.
രോഗശമനവുമായി ബന്ധപ്പെട്ടും ഹോര്‍മോണ്‍ തകരാറുകള്‍ ക്കും വജ്രം ധരിക്കാം. ലൈംഗിക രോഗങ്ങള്‍, ലൈംഗിക വിരക്തി എന്നിവ മാറാനും ശരീരപുഷ്ടിക്കും സൗന്ദര്യ വര്‍ദ്ധനവിനും വജ്രധാരണം സഹായിക്കും .ഗര്‍ഭാശയ രോഗങ്ങള്‍ മൂലമുള്ള സന്താന പ്രശ്നങ്ങള്‍ പരിഹരിക്കാനും വജ്രം ധരിക്കാം. കലാപ്രവര്‍ത്തന രംഗത്തെ വിജയത്തിന് ഇത് സഹായിക്കും. ഫാഷന്‍ രംഗത്തെ പ്രവര്‍ത്തനം, ടെലിവിഷന്‍ സിനിമാ രംഗത്ത് പ്രവര്‍ത്തിക്കുന്നവര്‍ , ബ്യൂട്ടീഷ്യന്മാര്‍ , വസ്ത്ര-ആഭരണ വ്യാപാരികള്‍ എന്നിവര്‍ക്കും ഗൈനക്കോളജി ഡോക്ടര്‍മാര്‍ കോസ്മറ്റോളജി ഡോക്ടര്‍മാര്‍ എന്നിവര്‍ക്കും ജാതക പ്രകാരം അനുയോജ്യമാകുമെങ്കില്‍ വജ്രം ധരിക്കുന്നത് തൊഴില്‍പരമായി നല്ല ഫലം നല്‍കും.
അനുയോജ്യമല്ലാത്തവര്‍ വജ്രം ധരിച്ചാല്‍
ജാതക പ്രകാരം അനുയോജ്യമല്ലാത്തവര്‍ വജ്രം ധരിച്ചാല്‍ ദാമ്പത്യ ജീവിത തകര്‍ച്ചയാണ് ഫലം. സൗന്ദര്യനാശം, വിരഹം, അലസത, മടി, ശത്രുശല്യം, ശാരീരിക കയ്യേറ്റങ്ങള്‍ തുടങ്ങിയവയും അനുഭവിക്കേണ്ടി വരും. വിദ്യാഭ്യാസ കാലത്ത് ആണ്‍കുട്ടികളും പെണ്‍കുട്ടികളും യാതൊരു കാരണവശാലും വജ്രം ധരിക്കരുതെന്നാണ് ശാസ്ത്രം പറയുന്നത്. ഇത് മറ്റു വിഷയങ്ങളില്‍ ആകൃഷ്ടരാക്കുകയും വിദ്യാഭ്യാസം കുഴപ്പത്തിലാകാന്‍ കാരണമാകുകയും ചെയ്യും.
ഇന്ന് നമ്മുടെ നാട്ടില്‍ പൊതുവായി കണ്ടു വരുന്ന ഒന്നാണ് വിവാഹത്തിന് വജ്രം പതിപ്പിച്ച താലി കെട്ടുന്നത്. കൂടാതെ വിവാഹ നിശ്ചയ വേളയില്‍ വജ്ര മോതിരങ്ങള്‍ അണിയുന്നതും ഇന്ന് സാധാരണമാണ്. ഇത്തരത്തില്‍ വിവാഹദിവസം വജ്രാഭരണം അണിയാന്‍ താല്‍പര്യമുള്ളവര്‍ ജാതക പ്രകാരം അനുയോജ്യമാണെങ്കില്‍ മാത്രം വാങ്ങുക. അല്ലാത്തപക്ഷം ഗുണത്തേക്കാളേറെ ദോഷഫലമായിരിക്കും ഉണ്ടാവുക.
മോതിരമോ, മാലയോ, കമ്മലോ, മൂക്കുത്തിയോ ആയി വജ്രം ധരിക്കാം. എന്നാൽ ഇപ്പോഴും ശരീര സ്പർശം ലഭിക്കത്തക്ക വിധത്തിൽ അടിഭാഗം തുറന്ന മോതിരമാക്കി ധരിക്കുന്നതാണ് ഏറ്റവും ഉത്തമം. ധരിക്കാന്‍ തുടങ്ങുന്ന അന്ന് മുതല്‍ അനുകൂല മാറ്റങ്ങള്‍ കണ്ടു തുടങ്ങും.
അറിയണം നാല് ‘സി’കള്‍
വജ്രത്തിന്‍റെ മൂല്യം കണക്കാക്കുന്നത് പ്രധാനമായും നാല് ‘സി’കളെ അടിസ്ഥാനമാക്കിയാണ്.
കാരറ്റ് :വജ്രത്തിന്‍റെ ഭാരം
ക്ലാരിറ്റി :സുതാര്യത
കളര്‍ :നിറത്തിന്‍റെ വിവിധ ഗ്രേ‍ുകള്‍
കട്ട് :ഏതെല്ലാം രീതിയില്‍ കട്ടിങ്ങുകളുണ്ട്
സ്വര്‍ണത്തിന്‍റെ കാര്യത്തില്‍ കാരറ്റ് എന്നാല്‍ ഗുണമേന്മയെ സൂചിപ്പിക്കുന്നു. ഇവിടെ വജ്രത്തിന്‍റെ ഭാരം സൂചിപ്പിക്കാനാണ് കാരറ്റ് ഉപയോഗിക്കുന്നത്.
വജ്രം ധരിക്കേണ്ടത് എങ്ങിനെ?
വെള്ളിയാഴ്ച രാവിലെ ഉദയം മുതല്‍ ഒരു മണിക്കൂറിനകം വരുന്നതായ ശുക്രന്‍റെ കാലഹോരയില്‍ വജ്രം ധരിക്കാം. വൃത്തിയോടെയും ആദരവോടെയും അവനവന്‍റെ ആരാധനാ സമ്പ്രദായ പ്രകാരം ധരിക്കുന്നതാണ് ഏറ്റവും ഉത്തമം. പൂജകള്‍ നടത്തുന്നതും നല്ലതാണ്. കുറഞ്ഞത് 20 സെന്റ് ഭാരത്തിലുള്ള വജ്രമെങ്കിലും ധരിക്കണം.
